शेतमजुराच्या मुलापासून ४ फॅक्टरींच्या मालकापर्यंतचा प्रेरणादायी प्रवास: नीलकंठ चौधरी!

अत्यंत सर्वसामान्य शेतमजूर कुटुंबात जन्म घेऊन, स्वतःच्या हिमतीवर स्कॉलरशिपच्या जोरावर शिक्षण पूर्ण करत आज ४५ हजार चौरस फुटांच्या विस्तारात तब्बल चार फॅक्टरींचे मालक बनण्याचा नीलकंठ चौधरी यांचा प्रवास खरोखरच प्रेरणादायी आहे. त्यांनी स्थापन केलेल्या ‘सनराईज प्रोसेस इक्विपमेंट प्रायव्हेट लिमिटेड’ या कंपनीमार्फत केमिकल आणि फार्मास्युटिकल उद्योगांसाठी लागणाऱ्या अत्याधुनिक मशिनरींची निर्मिती केली जाते. यामध्ये रिएक्टर्स, हीट एक्सचेंजर, डिस्टिलेशन कॉलम, स्टोरेज टँक्स, ड्रायर्स आणि फिल्टर्स अशा महत्त्वाच्या उपकरणांचा समावेश आहे.

रिलायन्स, थर्मॅक्स, कॅमलिन, जिंदाल, एशियन पेंट्स, बीआरसी, आर. ड्रग, आरती इंडस्ट्रीज आणि अतुल लिमिटेड यांसारख्या भारतातील आघाडीच्या कंपन्यांना त्यांच्या मशिनरींचा पुरवठा केला जातो. याशिवाय अमेरिका, सिंगापूर, अबुधाबी, श्रीलंका, बांगलादेश, टांझानिया, बोस्निया, तुर्की, चीन, दक्षिण कोरिया, झांबिया, इथिओपिया, नायजेरिया आणि इंग्लंड अशा सुमारे १४ ते १५ देशांमध्ये त्यांच्या उत्पादनांची यशस्वी निर्यात केली जाते.

शिक्षण पूर्ण झाल्यानंतर नीलकंठ चौधरी यांनी तब्बल १४ वर्षे नोकरी करून कामाचा सखोल अनुभव घेतला. १९९० मध्ये भागीदारीत व्यवसाय सुरू केल्यानंतर, १९९८ मध्ये त्यांनी स्वतंत्रपणे ‘सनराईज प्रोसेस इक्विपमेंट’ची स्थापना केली. टप्प्याटप्प्याने विस्तार करत आज त्यांच्याकडे चार फॅक्टरी असून शेल रोलिंग, डिशिंग मशीन, एक्स-रे, मशिनिंग, डिझायनिंग आणि क्वालिटी कंट्रोल या सर्व सुविधा एकाच छताखाली इन-हाऊस उपलब्ध आहेत. त्यामुळे कामाचा वेग वाढतो आणि डिलिव्हरीवर पूर्ण नियंत्रण राहते.

त्यांच्या कंपनीने ल्युपिनसाठी रिएक्टर्स, एशियन पेंट्ससाठी ५० हजार लिटरचे दहा रिएक्टर्स तसेच विशाखापट्टणमला २००० लिटरचे ५३ रिएक्टर्स एकाच ऑर्डरमध्ये पुरवले आहेत. ग्रासिम इंडस्ट्रीजसाठी १२० फूट लांबीचे हेवी फॅब्रिकेशनचे उपकरण बनवणे, मल्लक स्पेशालिटीसाठी ८० बार प्रेशरचे उपकरण तयार करणे तसेच डिफेन्स विभागासाठी परदेशातून आयात होणारी मशिनरी अत्यंत कमी खर्चात स्थानिक पातळीवर विकसित करणे ही त्यांच्या तांत्रिक क्षमतेची काही ठळक उदाहरणे आहेत. निर्यात क्षेत्रातही अबुधाबीला सलग तिसऱ्यांदा डिस्टिलेशन कॉलमची ऑर्डर, झांबियातील कॉपर खाणींसाठी रोटरी ड्रायर्स आणि इथिओपियाला पर्यावरणपूरक सँड ड्रायर देण्यात आला आहे.

नवीन उद्योजकांना मार्गदर्शन करताना नीलकंठ चौधरी सांगतात की, कोणताही व्यवसाय सुरू करण्यापूर्वी त्या क्षेत्राचा प्रत्यक्ष अनुभव आणि सखोल माहिती घेणे अत्यंत आवश्यक आहे. कच्चा माल, उत्पादन प्रक्रिया, विक्री व निर्यातीचे मार्ग तसेच खर्चाचा अचूक अंदाज घेऊन भक्कम प्रोजेक्ट रिपोर्ट तयार करावा. स्वतःकडे पुरेसा निधी आणि आपत्कालीन तरतूद ठेवून उत्तम सिबिल स्कोर व क्रेडिट रेटिंग राखावे. थेट बँकेकडे न जाता जिल्हा उद्योग केंद्राच्या माध्यमातून तसेच केंद्र व राज्य शासनाच्या विविध कर्ज योजनांचा अभ्यास करून, भक्कम इच्छाशक्ती आणि मेहनतीच्या जोरावर पावले उचलल्यास व्यवसायात यश नक्कीच मिळते.

Nilkanth Chaudhari
Nilkanth Chaudhari

Leave a Reply

Your email address will not be published. Required fields are marked *